Жогорку Кеңештин Эл аралык иштер, коргоо, коопсуздук жана миграция боюнча комитетинин төрагасынын орун басары Эльдар Сулайманов Азербайжан Республикасынын Баку шаарында өткөн Түрк мамлекеттеринин парламенттеринин коргоо жана коопсуздук комитеттеринин төрагаларынын экинчи жыйынына катышты.
Жыйындын алкагында түрк мамлекеттеринин парламент өкүлдөрү коопсуздук жаатындагы негизги чакырыктарды, анын ичинде терроризм коркунучунун өсүшү, чек ара аралык кылмыштуулук, киберкоопсуздук жана аскердик технологиялардын өнүгүшү сыяктуу маселелерди талкуулашты. Катышуучулар заманбап чакырыктарга туруштук берүү үчүн парламенттер аралык диалогду жана тармактык комитеттердин кызматташтыгын активдештирүүнүн зарылдыгын белгилешти.
Иш-чарада сөз сүйлөгөн Эльдар Сулайманов парламенттик дипломатиянын өлкөлөр ортосундагы өз ара аракеттенүүнү бекемдөөдөгү маанилүү ролун белгилеп: «Парламенттик дипломатия – бул жөн гана курал эмес, өз ара ишенимди бекемдөөчү натыйжалуу механизм. Бүгүн биз бул багытка жаңы дем берүү мүмкүнчүлүгүнө ээбиз», — деди.
Ошондой эле эл өкүлү эл аралык аянтчалардын тажрыйба алмашуу, позицияларды макулдашуу жана жаңы демилгелерди иштеп чыгуу үчүн маанилүү аянтча экенин айтып, аталган жыйын Түрк мамлекеттеринин парламенттер аралык кызматташуусун тереңдетүү жана коопсуздук жаатындагы биргелешкен аракеттердин натыйжалуулугун жогорулатуу боюнча кезектеги кадам болгонун кошумчалады.
Посмотреть эту публикацию в Instagram
