Бүгүн, 20-марттагы Жогорку Кеңештин жыйынында депутаттарды шайлоо тартибин өзгөртүү боюнча демилгеленип жаткан мыйзам долбоорунун талкуусунда депутат Медер Алиев бир жаран эки жолу депутат боло алат деген чектөөнү киргизүү тууралуу пикирин айтты.
Ал демилгечилердин бири депутат Улан Примовго «30 жылдан бери кайра-кайра шайланып келген адамдарга чектөө киргизсек кандай болот, сиздин жеке оюңуз кандай?» деп суроо салды. Демилгечи депутат бул жарандардын конституциялык укугун чектөө болуп каларын айтты.
Айрым учурда парламентке олигархтар келип жатканын айткан Медер Алиев мындай көрүнүштү токтотуунун жолун кароону кошумчалады. «Эгемендүүлүк алгандан бери жалаң уурдагандар, мыйзамсыз байыган олигархтар келип жатат. Аларды шайлабоо үчүн элдин да шайлоого аң-сезими карата өзгөрүшү керек», — деди Алиев.
Жогорку Кеңеште депутаттар шайлоо тартибин өзгөртүүнү сунуштап жаткан долбоорго ылайык, Кыргызстанда 30 шайлоо округу болот. Ар бир округга 3 мандат берилип, анын экөөсү эркекке, бирөөсү аялга берилет.
