Депутат социалдык тармактарда анын катышуусу менен тартылган видео тараганын эске салып, ал анын аброюна зыян келтирип жатканын айтты. «Конституцияда ар бир адам жеке жашоосунун кол тийбестигине, ар-намысы менен кадыр-баркын коргоого укуктуу экени жазылган. Жогорку Кеңештин депутаты кол тийбестикке ээ. Азыр мен катышкан видео хайп болуп жатат. Менин аты-жөнүмдү каралоо жүрүп жатат. Эреже бузуу кечки саат 7де катталган, ал эми Патрулдук милиция мени түнкү саат 11де тапкан. Бул канчалык мыйзамдуу?» — деди ал.
Ички иштер министрлигине караштуу Жол кыймылынын коопсуздугун камсыздоо башкы башкармалыгынын башчысы Азамат Козукеев депутаттын арызы каралып жатканын айтты. «Сиздин арызыңыз каралууда. Жооп сизге жөнөтүлөт», — деди ал.
Кокулов болсо сөз арыз тууралуу эмес экенин тактады: «Арыз — башка маселе. Сиздер мыйзам өкүлдөрүсүздөр. Мен башка нерсени сурап жатам. Суроомо жооп бериңиз», — деди ал.
Козукеев бул факты боюнча териштирүү жүрүп жатканын билдирди. «Кызматкер жарандардын кайрылуусунун негизинде ошол жерге барган. Текшерүү аяктагандан кийин жооп берилет», — деди ал.
Депутат ошондой эле социалдык тармактардагы «БишкекПолис» баракчасы расмийби деп сурады.
Козукеев анын расмий эмес экенин айтты. Мындан кийин Кокулов видеонун жарыяланышына нааразычылыгын билдирди: «Анда эмне үчүн алар мени мазактап, жеке жашоого болгон укугумду бузуп интернетке видео чыгарышты? Эмне үчүн аларда төшкө тагылуучу видеокамера болгон эмес? Эмне үчүн кызматкер форма кийбей келген? Эмне үчүн ГАИнин басма сөз кызматынын өкүлү протокол түзгөн? Эмне үчүн мыйзамдарды бузуп туруп хайп жасап жатасыздар? Өзүңөр мыйзам бузуу болгонун билсеңер да», — деди депутат. Анын айтымында, жарыяланган видео кесилген жана ал чатак чыгаргандай көрүнүш жаратып жатат. «Силер видеону кесип, мен ал жерде ызы-чуу чыгаргандай кылып көрсөтүпсүңөр. Чынында мен бир гана суроого жооп күтүп турганмын. Протоколду эртеси күнү да түзсө болмок. Мен жеке жашоого болгон укугумду бузбоону сурангам», — деди ал.
Ички иштер министринин орун басары Октябрь Урмамбетов кызматкерлер автоунаа кимге таандык экенин билишпегенин айтты. «Эч ким бул машина сиздики экенин билген эмес. Жарандардан арыз түшкөн, кызматкерлер барып текшеришкен. Сиздин кайрылууңуз боюнча иликтөө жүрүп жатат», — деди ал.
Кокулов мындай аракеттер укук коргоо органдарына болгон ишенимди төмөндөтөрүн билдирди. «Мындан кийин кантип ишенебиз? Бүт өлкөгө мени уят кылдыңар. Видео ИИМдин расмий эмес баракчасында жарыяланган — бул дагы мыйзам бузуу. Алар видеону жарыялоого укуктуу эмес. Мени телефонго тартып алышкан, төшкө тагылуучу камера болгон эмес. Эми түн ичинде адамдарды үйүнөн чыгарып кетүү практикасы пайда болобу? Бул болгону 300 сом айып пул салынуучу административдик укук бузуу эле. Бир нерсе кылуудан мурда мыйзамдуулугун ойлош керек», — деди ал.
Депутат айткан окуя 26-февралдын кечинде болгон. Социалдык тармактарда туура эмес токтотулган унаалар тууралуу видео тараган. Анда Lixiang L7 PRO үлгүсүндөгү, 01KG065AB мамлекеттик номерлүү унаанын айдоочусу ошол жерден кетип бара жаткан учур да көрсөтүлгөн.
Кийинки күнү Патрулдук милиция кызматынын басма сөз кызматы билдиргендей, Тойгонбаев көчөсү, 13 дарегиндеги үйлөрдүн тургундарынан туура эмес токтотулган унаалар боюнча 102 кызматына арыз түшкөн. Натыйжада патрулдук милиция Эрулан Кокуловго карата жол кыймылынын эрежесин бузганы үчүн протокол түзгөн.
Мен жеке ойум Эруландын дооматтары туура, мыйзам тышы жарандарыбызды тунку саат 11 уйлорунон сууруп чыгып ,видеого тартып мазактоого эчкимдин акы укугу жок! Бул заказной подстава,провокация! элдин укуктарын колдогон Элдик жигитти — элибизге абройун тушуруп жаман корсоткондору учун — жарандарыбызды коргобойле булар тескери озулорун алдына ала сасык амалдарын кылып жатышат.