Бүгүн, 31-мартта Жогорку Кеңештин Эл аралык иштер боюнча комитетинин жыйынында депутат Кубанычбек Самаков тышкы иштер министринин орун басары Алмаз Имангазиевден «Крокус сити холлдогу» терактка шектелгендер арасында Кыргыз жарандары бар же жок экенин, иликтөө кандай жыйынтыкталганын сурады.
«Анткени кырсыктан кийин шектелгендер арасында кыргызстандыктар бар деп айтылган эле. Ошол терактан кийин биздин Орусияда жүргөн мигранттарыбызга тартип шарттары татаалдаштырылып, күчөтүлө баштаган болчу. Иликтөөнүн жыйынтыгы бүттү да. Кыргыз жарандарынын терактка канчалык тиешеси бар экен?» — деп суроо салды Самаков.
Тышкы иштер министринин орун басары Алмаз Имангазиев шектелгендер жана кармалгандар арасында Кыргыз жарандары жок экендигин ырастады.
«Башында Орусия тараптан шектелгендер арасында Кыргыз жарандары да бар деген маалыматтар берилген. Биздин элчиликтин кызматкерлери текшерүү жумуштарын жүргүзгөн. Бир дагы Кыргыз жараны шектелген да, кармалган да жок. Бул расмий маалымат», — деди Имангазиев.
