«Ишеним» фракциясынын лидери Улугбек Ормонов бүгүн, 10-апрелдеги Жогорку Кеңештин жыйынында сөз сүйлөп, Кыргызстандын Чикаго шаарындагы Башкы консулдугунун ишмердүүлүгүн сынга алды.
Эл өкүлү 5-6-апрель күндөрү АКШнын Огайо штатындагы Цинциннати шаарында кыргыз күрөшү боюнча алгачкы жолу ачык чемпионат өткөнүн, ага өзү ардактуу мейман катары катышып келгенин белгиледи. Эл аралык кыргыз күрөш федерациясы жана АКШдагы мекендештердин өз күчү менен уюштурулган мелдешке Кыргызстан, Өзбекстан, Орусия жана АКШнын 8 штатынан балбандар катышканын айткан депутат иш-чарага Чикагодогу Башкы консулдук да чакырылганын, бирок келбегенин айтты.
«Миңдеген чакырым алыстагы мекендештерибиз кыргыз экенин унутпай, улуттук кийимдерди кийип алып, мелдешти жакшы өткөрүүгө аябай даярданышыптыр. Ага Цинциннати шаарынын спорт башчылары да келишти. Бирок ошол жерге Башкы консулдуктан бир да адам келип катышпаганы мени өкүндүрдү. Бул биринчи жолу эмес экен. Мекендештер улуттук оюнду жайылтууга чоң салым кошуп жатышат. Ага жардам бербесе да, моралдык колдоо көрсөтүп койгону чоң белек болчу», — деди эл өкүлү.
Ошондой эле Башкы консулдуктун негизги милдети чет жердеги мекендештерге кам көрүү экенин белгилеген депутат Улугбек Ормонов мындай кайдыгерликке Тышкы иштер министрлиги көңүл буруп, Жогорку Кеңеш тарабынан баа берилиши керектигин кошумчалады.
