Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин Регламенти боюнча комитети «Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык мыйзамына өзгөртүүлөрдү киргизүү тууралуу» конституциялык мыйзам долбоорун биринчи окууда колдоого алды.
Аталган мыйзам долбоорун Жогорку Кеңештин төрагасы Нурланбек Тургунбек уулу, депутаттар Нурбек Сыдыгалиев, Акылбек Түмөнбаев, Кундузбек Сулайманов, Марлен Маматалиев, Улан Примов, Данияр Толонов, Жумабек Салымбеков, Чыңгыз Ажибаев, Советбек Рустамбек уулу жана Жайлообай Нышанов демилгелеген.
Мыйзам долбоору тууралуу демилгечилердин бири, депутат Улан Примов маалымат берип, ал Жогорку Кеңештин депутаттарын шайлоо жол-жоболорун өркүндөтүү, саясий коррупцияга каршы күрөшүү жана шайлоонун учурдагы системасынын кемчиликтерин четтетүү, жарандардын эл өкүлдөрүнө болгон ишеним деңгээлин жогорулатуу максатында иштелип чыкканын белгиледи. Ага ылайык жашыруун добуш берүүдө жалпыга бирдей жана тике шайлоо укугунун негизинде мамлекеттин жогорку өкүлчүлүктүү органы – Кыргыз Республикасынын Жогорку Кеңешин түзүүнүн жаңы механизми каралууда.
Алсак, Жогорку Кеңештин 90 депутаты көп мандаттуу аймактык шайлоо округдары боюнча мажоритардык тутум аркылуу шайланат. Көп мандаттуу аймактык шайлоо округдары боюнча депутаттыкка талапкерлерди көрсөтүүдө саясий партия бир жыныстагы талапкерлердин 70 пайыздан ашпаган өкүлчүлүгүн эске алууга милдеттүү.
«Жогорку Кеңештин депутаты мөөнөтүнөн мурда кызматтан кеткен учурда, депутаттык мандат тиешелүү көп мандаттуу аймактык шайлоо округунда эң көп добуш алган кийинки талапкерге берилет. Жогорку Кеңештин депутаты аял киши болсо, анда депутаттык мандат тиешелүү көп мандаттуу аймактык шайлоо округунда эң көп добуш алган кийинки аял талапкерге берилет», — деп билдирди Улан Примов.
Талкуунун жүрүшүндө комитеттин төрайымы Чолпон Султанбекова учурдагы шайлоо мыйзамдарында ден соолугунан мүмкүнчүлүгү чектелген адамдар үчүн атайын ченемдер жазылганын белгилеп, бул ченемдер сунушталып жаткан мыйзам долбоорунда да каралышы керектигин ортого салды. Ал эми эл өкүлү Замирбек Мамасадыков шайлоо күрөөсүнүн өлчөмү, шайлоо алдындагы үгүт иштерине тартылган үгүтчүлөрдүн саны боюнча суроолорду тактады. Депутат Дастанбек Жумабеков Жогорку Кеңештин депутаты мөөнөтүнөн мурда кеткен учурда депутаттык мандатты өткөрүп берүү жөнүндөгү ченемге көңүл бурду.
