Эл өкүлү Рустамбек уулу Советбек Саламаттыкты сактоо министрине кайрылып, Ноокаттагы үй-бүлөлүк медициналык борборунун администрациясынын көйгөйүн жеткирди.
Депутаттын айтымында, аталган борбордун башкы корпусу Гулистан айыл өкмөтүнө караштуу Солтобаев көчөсү, 24 дарегинде жайгашкан. Алгачкы документтеринде башкы корпус 34 сотых жерди камтыган. Бирок азыркы учурда 10 сотых жери жеке жакка өтүп кеткен.
Рустамбек уулу Советбек: «Ошол жерди кайра оорукананын аймагына алып берүүңүздү суранабыз. Себеби калктын саны күндөн күнгө өсүп, дарыгерлер жетишсиз. Дарыгерлерди алып кирейин десек, аларга кабинет бергенге жайыбыз жок. 10 сотых жерди алсак, бир топ маселелер чечилип, кадрлардын да, элдин да керегине жарамак. Себеби башка айыл өкмөт бербей жатыптыр. Ноокат районунда азыр 327 миң калк бар. Ушуну өзүңүз көзөмөлгө алып, тапшырма берип чечип берсеңиз», — деп кайрылган оорукананын жетекчилигинин өтүнүчүн министрге жеткирди.
Саламаттыкты сактоо министри Алымкадыр Бейшеналиев бул маселени өз көзөмөлүнө алаарын, өзү сотко катышаарын убадалады.
31-январда «Ишеним» жана «Ыйман Нуру» парламенттик фракцияларынын жыйынында саламаттыкты сактоо тармагындагы көйгөйлөр, чечүү жолдору тууралуу маалымат угулду. Аталган маселе боюнча саламаттык сактоо министри Алымкадыр Бейшеналиев баяндама жасаган.
This is a modal window.
