Бүгүн, 26-февралдагы Жогорку Кеңештин жыйынында Балбак Түлөбаева мурдагы Суу чарба департаментинин директору Алмазбек Сокеев жакшы иштеп жатканын, эмне себептен жумуштан кеткени түшүнүксүз экенин айтты.
«Алмаз Сокеев боюнча айткым келет, өткөндө өкмөттүн жыйынын көрдүк. Алмаз келгени суу чарбада бир топ алгылыктуу иштер жасалып, алга жылып жаткан эле. Мен албетте өкмөттүн ишине кийлигише албайм, бирок жакшы иштерди жасап жаткан кишини жумуштан алганы түшүнүсүз болуп калды. Албай турган кишилерди жумуштан аласыңар, анан иштебеген адамдарды албайсыңар, ушуга таң калам. Министрлер кабинетинин төрагасына жеткирип коюңуз Алмасбек Акунжанович, Сокеев боюнча өкмөттүн позициясын билгибиз келет, бизге абдан маанилүү», — деди Түлөбаев.
Кесиптешин колдогон төрага Нурланбек Тургунбек уулу да Алмаз Сокеев Суу чарба департаментинин директору катары абдан мыкты жетекчи болгонун кошумчалады.
«Ушул жигиттен өткөн бүгүнкү күндө Кыргызстандын суу ресурстарын, каналдарды мыкты билген жетекчи жокко эсе. Албетте өкүнүчтүү. Иш болгон жерде кемчилдик болбой койбойт. Оркойгон чоң мүчүлүштүк болбосо, мындай кесипкөйлөрдү кетирүүдө өкмөт терең талдоо жүргүзсөңөр», — деди төрага.
Эл өкүлү Марат Мураталиев да Сокеев жакшы иштегенин айтып: «Аны кызматка кайра дайындаса жакшы болмок», — деп кошумчалады.
Алмазбек Сокеев 21-февралда өткөн президенттик администрациянын коллегиясынын жыйынтыгы боюнча айыл чарба министринин орун басары-суу ресурстары кызматынын директору кызматынан бошотулган. Ал 2024-жылдын март айынын ортосунан бери министрдин орун басары, 2021-жылдын март айынан бери Суу ресурстары кызматынын директору болуп иштеп келген.
