Дүйнөгө белгилүү ырлардын аткаруучусу Jay Sean Бишкекке келди. Jay Sean’ду сиз “Ride it”, “Maybe”, “Tonight” жана башка ырлары менен тааныйсыз. Ырчыны тосуп алуу аземине биз да катышып, андан биздин өлкө тууралуу пикирин сурап, жооп алдык.
— Кыргызстанга кош келипсиз.
— Чоң рахмат.
— Кандай учуп келдиңиз?
— Абдан жакшы, чоң рахмат. Уктап, уйкумду кандырып алып, эс алып калдым.
— Сонун. Аба ырайы жактыбы?
— Аба ырайы чынында Нью-Йорктукундай эле экен. Ал жакта да кар жаап жатат. Мен Нью-Йоркто жашайм да, ошондуктан окшош эле сезим болуп жатат. Баары жайында.
— Бул сиздин Кыргызстанга биринчи келишиңизби?
— Ооба, биринчи жолу бул өлкөгө келип толкунданып турам.
— Кыргызстан сизге кандай таасир калтырды?
— Биринчи кезекте абдан жылуу тосуп алышты. Салттуу стилде тосуп алганыңыздар жагымдуу болду. Дүйнө жүзүн кыдырып, жаңы маданият менен таанышып, элдердин салт-санаасын көрүү мага шык берет. Мен ушул үчүн жашайм. Ушул нерсе мага абдан жагат. Дүйнө кыдыруудагы мага эң жакканы ушул.
— Сиз дүйнө кыдырып көп концерт бергенсиз да. Жаңы өлкөгө келип, чыгармачылыгыңызды тартуулоонун алдында кандай сезимдер болуп жатат?
— Толкундануу. Мен азыр эле элдин энергиясын сезип жатам. Анткени кыргызстандыктар менин концертиме биринчи жолу күбө болушат. Дээрлик 25 жылдан бери дүйнө жүзүндө саякаттап, канча деген өлкөнү кыдырганымды ойлосом, жаңы нерсе жаратып, жаңы аудиториянын алдында ырдоо мүмкүнчүлүгүм бар экени – өзгөчө сезим. Көптөн бери мындайды сезе элек элем. Ошондуктан, өзүмдүн да энергиямды жаңы аудиторияга тартуулоого кубанычтамын.
— Бишкекте жүргөнүңүздө шаар кыдырып же тоолорду көрүүгө убактыңыз болобу?
— О-оо, ооба, албетте. Алгач кичине уктап, эс алып алайын. Анан толук бир күн бою шаарды, табиятты көрүп келебиз. Мен тоолорго баргым келет. Балким ат минип көрөм. Мунун баарын өз көзүм менен көрүп, сезгим келет. Бул абдан керемет көрүнүш.
— Чоң рахмат.
