Эсептөө палатасы тарабынан 2023-жылдын 1-январынан 31-декабрына чейинки мезгилде Эмгек, социалдык камсыздоо жана миграция министрлигинде жана анын түзүмдүк бөлүмдөрүндө бюджеттин аткарылышына жүргүзүлгөн шайкештик аудит олуттуу мыйзам бузууларды жана каржылык тартиптеги кемчиликтерди ашкереледи. Жалпы бузуулардын жана кемчиликтердин суммасы 233 миллион 464,6 миң сомду түздү.
Аудиттин жүрүшүндө финансылык мыйзам бузуулар, бюджеттин резервдеринин жоготуулары, каражаттарды рационалдуу пайдаланбоо жана мамлекеттик сатып алуулар тармагындагы мыйзам бузуулар катталган. Эсептөө палатасы бюджеттик каражаттардын сарпталышы министрликтин ишмердүүлүгүндө олуттуу көйгөйлөр бар экенин белгилейт.
Финансылык бузуулар — 13,3 миллион сом.
Финансылык тартиптеги кемчиликтердин жалпы суммасы 13 326,8 миң сомду түздү, анын ичинен 5 005,0 миң сому аудиттин жүрүшүндө калыбына келтирилген, ал эми 8 321,8 миң сому кайтарылууга жатат.
Негизги фактылар:
Товардык-материалдык баалуулуктардын кем чыгуусу — 20,9 миң сом. Бул сумма толугу менен аудит маалында калыбына келтирилди.
Иш сапар (Командировкалык) чыгымдарды негизсиз эсептен чыгаруу — 175,0 миң сом. Анын ичинен 8,0 миң сому кайтарылып, 167,0 миң сому ордуна коюла элек.
Бухгалтердик эсепте көрсөтүлбөгөн дебитордук карыздар — 13 130,9 миң сом. Аудит учурунда 4 976,1 миң сому калыбына келтирилип, дагы 8 154,8 миң сому кайтарылышы керек.
Бюджеттин резервдери жана жоготуулары — 98,5 миллион сом.
Министрликте бюджеттик каражаттарды пайдаланууда олуттуу жоготуулар жана резервдер аныкталды. Жалпы суммасы — 98 519,1 миң сом. Алардын ичинен 2 981,2 миң сому кайтарылышы керек болсо, бул күнгө карата каражаттар кайтарылбай турат.
Негизги бузуулар:
Эмгек акы төлөөдөгү бузуулар — 92 264,2 миң сом.
Бюджеттин башка жоготуулары жана резерви — 6 254,9 миң сом.
Рационалдуу эмес колдонулган каражаттар — 120,3 миллион сом.
Министрликтин жана анын түзүмдүк бөлүмдөрүнүн бюджеттик каражаттарды пайдаланууда натыйжасыз иш алып барганы байкалган. Жалпы 120 258,0 миң сом рационалдуу эмес колдонулганы аныкталды, анын ичинен 102 655,7 миң сому жергиликтүү бюджеттен каржыланган.
Аудиттин жүрүшүндө 17 602,3 миң сомдун орду толтурулушу талап кылынган, бирок 17 520,8 миң сому кайтарылган, дагы 81,5 миң сому кайтарылууга жатат.
Бюджеттин аткарылышы боюнча отчеттуулуктун бузулушу — 1,36 миллион сом.
Министрликтин финансылык отчеттуулугунда бир катар кемчиликтер аныкталды. Жалпы сумма — 1 360,7 миң сом. Анын ичинен 179,2 миң сому калыбына келтирилип, калган 1 181,5 миң сому кайтарылышы керек.
Мамлекеттик сатып алуулар боюнча мыйзам бузуулар — 69,9 миллион сом.
Министрлик тарабынан мамлекеттик сатып алууларды жүргүзүүдө 69 964,0 миң сомдук мыйзам бузуулар катталган. Бул “Мамлекеттик сатып алуулар жөнүндө” мыйзамынын талаптарынын аткарылбаганын тастыктайт.
Аудит Эмгек, социалдык камсыздоо жана миграция министрлигинде каржылык тартипти күчөтүү жана бюджеттик каражаттарды пайдаланууда көзөмөл механизмдерин жакшыртуу зарылдыгын көрсөттү. Андыктан Эсептөө палатасы министрликке аныкталган мыйзам бузууларды жоюу боюнча чараларды көрүү, каржылык тартипти чыңдоо жана бюджеттик каражаттарды максаттуу пайдалануу механизмдерин жакшыртуу, мамлекеттик сатып алуулар процессин ачык-айкын жүргүзүү жана мыйзам талаптарын так сактоо боюнча бир катар сунуштарды берди.
Аудиттин жыйынтыктары тиешелүү мамлекеттик органдарга жеткирилип, аныкталган кемчиликтерди жоюу боюнча чаралар көрүлмөкчү.
