Алдын ала маалымат боюнча, Жүрөк хирургиясы институтунда жабдуулардын биринин аккумулятору жарылган. Бул тууралуу бүгүн, 12-февралда Жогорку Кеңештин жыйынында Саламаттыкты сактоо министри Эркин Чечейбаев билдирди.
«Өрт жер төлөдөн чыккан. Учурда тиешелүү органдар өрттүн чыгуу себебин аныктоодо. Алдын ала маалыматтар боюнча, өрт кубаттуу жабдуулардын биринин аккумулятору жарылгандан келип чыккан. Ал ушунчалык күчтүү болгондуктан, эшик сыртка ийилип кеткен. Түтөп баштаганда күзөт кызматы дароо персоналга айткан. Алар терезелерди ачышкан. Түтүн 5-кабаттан операция блогунан чыккан. Анан жандандыруу бөлүмү жайгашкан 4-кабатка өткөн. Бардык бейтаптар Улуттук кардиологиянын жандандыруу бөлүмүнө которулган. Айрым бейтаптар операциядан чыгып, жандандыруу бөлүмүндө эле. Көз жумган балдар да операциядан чыккандыктан абалы ансыз да оор болчу. Тилекке каршы, аларды сактай албадык», — деди министр.
