Булчуң атрофиясы менен жабыркаган Асланга да акча чогултуу жыйынтыкталды. Бул тууралуу Асландын үй-бүлөсү социалдык тармактагы баракчасында жазды.

«Урматтуу кыргыз элим, дүйнөнүн ар кайсы бурчунда жашаган мекендештер! Сиздердин колдооңуздар, боорукерлигиңиздер жана ынтымактуулугуңуздар чексиз чоң күчкө ээ экенин дагы бир жолу далилдедиңиздер. Биз башында бир жылда чогулат деп ойлогон 170 миллион сомдук сумма сиздердин жүрөгүңүздөрдүн кеңдиги менен бир айга жетпей топтолду. Бул – элдин биримдигинин, боордоштуктун жана улуу жүрөктүн күчү!

Кыргызстан, Орусия, Казакстан, Америка, Өзбекстан, Корея жана башка өлкөлөрдөгү мекендештер! Ар бириңиздердин салымыңыздар биз үчүн ыйык. Ар бир сом, ар бир дуба, ар бир жайылган кол – Аслан үчүн үмүт белеги болду. Биз силерге чексиз ыраазыбыз! Сиздер кылган жакшылык миң эселеп кайтып келсин! Жараткан Аллах сиздерден ыраазы болуп, үй-бүлөңүздөргө бакыт, ден соолук жана береке берсин», — деп жазышты алар.

Буга чейин Кыргызстанда чанда кездешкен ооруга кабылган 1 жаш 11 айлык Хамза Ташбаевге да СМА диагнозу коюлган. Көптөгөн белгилүү инсандар, ыктыярчылардын жана кайдыгер эмес жарандардын жардамы менен Хамзанын илдетин жеңүүгө керек болгон Zolgensma уколуна делген 170 миллион сом чогулуп, акча чогултуу жабылган.