УКМК төрагасы Камчыбек Ташиев Базар-Коргон жана Ноокендеги ипотекалык үйлөрдүн курулушунан кабар алганы барган. Ал жерде Ноокен райондук администрациясынын жетекчисинин биринчи орун басары Жайнак Немат уулу менен сүйлөшүп калды.
«Сиздин акимдин биринчи орун басары болуп иштегениңизге 4 жыл болду ээ? Эмнеге 4 жылдан бери жылбадыңыз. Же жакшы иштебейсиз же колдоочуңуз жок жыла албай жүрөсүз. 4 жыл иштеген адамды аким кылыш керек. Бир жерди башкарып, зыңкыйып иштеш керек. Же эптеп-септеп күн өткөрөсүз же «аким бол» деген жетекчилер жок. Акимдин иштеп жатканына да 4 жыл болдубу? 4 жыл аким болуп иштеп жатса жакшы аким экен. Базар-Коргонго аким турбай жатат. Эгер Ноокенде Ысык-Көлдөн келген кызматкер 4 жылдан бери аким болуп иштеп жаткан болсо, ал жакшы аким экен. Сиз да аким болосуз. Уктуңузбу?
Ушул кишинин аты-жөнүн берчи. Бир жерге аким кылып жөнөтөлү. Түндүккө аким кылалы. Ошол жакта жакшы иште. Мен сени акимдикке сунуштайм. Аким таппай жатабыз»,- деди төрага.
