Бүгүн, 11-февралда Жогорку Кеңеште Транспорт, коммуникациялар, архитектура жана курулуш комитетинде «Жалпыга маалымдоо каражаттары» мыйзам долбоору биринчи окууда колдоо тапты.
Аталган мыйзам долбоорун былтыр президент Садыр Жапаров кайтарып алган эле. Аны Маданият, маалымат, спорт жана жаштар саясаты министрлиги кайрадан иштеп чыкты. Долбоордо ЖМКны каттоо, кайра каттоо, каттоодон баш тартуу жана каттоодон бошотуу критерийлери каралган.
Сунушталган мыйзам долбоорго ылайык, ЖМК расмий булактан алынган же коомдук жайда айтылган маалыматты чагылдырса жоопкерчиликке тартылбайт. Журналисттердин суроолоруна мамлекеттик органдар үч күндүн ичинде жооп берүүгө милдеттүү.
ЖМКнын ишмердүүлүгү кандай учурда токтотулат?
— ЖМКнын ишмердүүлүгү соттун чечими менен гана токтотулат;
— Бийликти күч менен басып алууга ачык чакырык жасаган, кастыкка же зордук-зомбулукка үндөгөн, рассалык жана диний касташууну күчөткөн, террористтик ишти жүзөгө ашырууга чакырган же терроризмди ачык актаган материалдарды бир жылда эки жолудан ашык жарыялаган ЖМКга жазуу түрүндө эскертүү берилет, ал аткарылбаса медиа жабылат.
