Бүгүн, 2-апрелде Жогорку Кеңештин төрагасы Нурланбек Тургунбек уулу аткаруу бийлигине жолду кеңейтебиз деген жүйө менен элди козутуудан оолак болушу керектигин эскертти.
“Албетте жолдун жарымын тосуп чыгып алгандарды бузса болот. Аны эл деле түшүнүп, макул болуп жатышат. Бирок аша чаап кеткен учурлар да катталууда. Буга этияттык менен мамиле кылыш керек”, – деди ал.
Муну менен катар телефон көтөргөн блогерлерге нааразычылыктар көбөйгөнүн белгилеп: “Блогерлер айтса эле укук коргоо, прокуратура органдары барып баса калып, текшерүүдөн башыбыз чыкпай калды деген арыздар келип түшүүдө. Анткени, айрым учурда негизсиз текшерүүдөн мамлекеттик мекемелер эле эмес, ишкерлер да ар кандай тоскоолдуктарга учурап жатканы боюнча мисалдар арбын. Албетте блогерлер жагдайды анализдеп, туура жана так маалымат берсе бир жөн. Бирок айрымдар ички таарынычтан улам айтып койсо эле барып баса калып, жабыла текшерүүгө алган учурлар катталып жатыптыр”, – деген төрага Министрлер кабинетин аталган маселеге да көңүл бурууга чакырды.
