Улуу Британияга болгон жумушчу сапарынын алкагында Кыргыз футбол биримдигинин президенти Камчыбек Ташиев Англиянын премьер-лигасында ойногон «Астон Вилла» футболдук клубунун жетекчилиги менен потенциалдуу кызматташтык боюнча сүйлөшүүлөрдү өткөрдү.
«Жолугушууда «Астон Вилла» клубунун адистерин катышуусу менен Кыргызстандын машыктыруучулар курамын даярдоо жана квалификациясын жогорулатуу, жаштар жана балдар футболун өнүктүрүү боюнча тажрыйба алмашуу, кыргыз клубдарынын катышуусунда биргелешкен окуу-машыгуу жыйындарын жана жолдоштук беттештерди уюштуруу, ошондой эле келечектеги кыргызстандык футболчуларды алмашуу программалары, анын ичинде ата-мекендик адистердин клубдун академиясында стажировкадан өтүү маселелери талкууланды.
«Астон Вилла» бренди аркылуу маркетинг тармагын өнүктүрүү, анын ичинде Кыргызстандын маданиятын жана туризмин таанытуу боюнча биргелешкен долбоорлорго өзгөчө көңүл бурулду. Камчыбек Ташиев «Астон Вилла» сыяктуу абройлуу клуб менен кызматташуу кыргыз футболунун эл аралык аренада өнүгүүсүнө жаңы мүмкүнчүлүктү ачарын баса белгилеп, ал эми англиялык клубдун өкүлдөрү кыргыз футболунун потенциалы жогору экенин белгилеп, биргелешкен демилгелерди ишке ашырууга көмөктөшүүгө даяр экендиктерин билдиришти. Тараптар Кыргызстан менен Улуу Британиянын ортосундагы спорттук байланышты чыңдоого макулдашты, бул Кыргызстандын футбол инфраструктурасын өнүктүрүүдө жана жаш таланттарды даярдоодо маанилүү кадам болот», — деп айтылат маалыматта.
