Жалал-Абад облусунун Ноокен районуна караштуу Тоскол-Ата токой чарбасында 300 гектар жерге мисте-бадам көчөттөрү олтургузулуп жатат. Бүгүн, 1-апрелде УКМК төрагасы Камчыбек Ташиев көчөттөр тигилип жаткан аймакка барды.
Жайыт жерди токойго айлантуу максатында мында 150 гектарына мисте, 150 гектарына бадам көчөттөрү олтургузулган. Тигилген көчөттөрдүн толук жетилиши үчүн 300 гектар жер толугу менен тосмолонгон. Мында жалпы 120 миң мисте, бадам көчөттөрү олтургузулду. УКМК төрагасы тарабынан көчөттөрдүн толук көктөшүн өзгөчө көзөмөлгө алуу жергиликтүү токой чарба кызматкерлерине бийлик өкүлдөрүнө милдеттендирилди.
Камчыбек Ташиев өлкө башчысы Садыр Жапаров тарабынан коюлган тапшырмалардын алкагында, «Жашыл мурас» программасын толугу менен ишке ашыруу зарылдыгына токтолду жана бул маселе эң маанилүү жана кечиктирилгис, туруктуу иш-аракеттерди талап кылаарын, аны аткаруу тийиштүү жетекчилердин туздөн-түз милдети экенин эскертти.
Өзгөчө кырдаалдар министрлигине караштуу Токой кызматы өткөн 2024-жылы 1650 гектар жерге көчөт тиккен. Ал эми 2025-жылы 2500 гектар жерге көчөт отургуузу пландалган. «Жашыл мурас» өнөктүгүнүн алкагында жайыт жерлерди токойго айлантуу, ошол эле учурда жаратылыш кырсыктарынын алдын алуу максатында ишке ашып жатат.
Жалал-Абад облусунда токойлордун жалпы аянты 290 миң гектар, анын ичинде басымдуу бөлүгү жаңгак токой аянты 33 миң гектар жерди ээлейт. Ал эми мисте өскөн аймак 28 миң гектар, калган токойлордо алма, алча, долоно жана башка дарактар өсөт.
