Казакстанда зордукталгандан кийин өз жанын кыйган фитнес-тренер кыздын агасы шектүүлөр кыйнап алдырган насыя тууралуу маалымат берген. Бул тууралуу «Тенгри» жазды.
Анын айтымында, коркутуу менен алынган 2 миллион теңгеге насыя дагы эле жабыла элек. Эсеп тоңдурулган жана ага эч кандай үстөк пайыз кошулбайт. Анын айтымында, соттолгондордун жакындары өкүм чыккандан бери 2,5 айдан ашык убакыт өтсө да, үй-бүлөгө акча берген эмес.
«Сот боло электе соттолгондордун жакындары телефон чалып, насыяны жаба тургандарын айтышкан. Сот бүткөндөн кийин эч ким келген жок. Бүгүнкү күнгө чейин соттун чечими менен келтирилген моралдык жана материалдык зыяндын ордун толтурууну кошкондо эч кандай төлөмдөр түшө элек», — деди ал.
Казакстанда өткөн жылдын май айында видео тараган. Видеодо Актаудагы көп кабаттуу үйлөрдүн биринен кыз киши кулап, жерде жатканы тартылган. Окуя 18-майда болуп, аталган факты боюнча «өзүн-өзү өлтүрүүгө жеткирүү» беренеси менен кылмыш иши козголгон.
Казакстандын «Не молчи» фонду эмне үчүн мындай кадамга барганын маркум кыздын агасына таянуу менен жазып чыккан.
Маркум турмушка чыга элек, жаш фитнес-тренер болгон. Жумуштан кийин үйүнө жалгыз бара жаткан. 15-майга караган түнү эркек балдар кызды көчөдөн көрүп, күч менен унаага отургузушкан. Түнү менен көзүн байлап, май куюучу жайда кыйнап, коркутушкан. Унаадагылардын бири «болбосо топ балдар зордуктайт» деп коркутуп, баңгизат берип, унаада мыкаачылык менен зордуктаган. Шектүү үй-бүлөсү бар, баланын атасы болгон. Таңга маал кыздын телефонунан 2 миллион теңге кредит алышкан. Топтун «башчысы» кызды шаарда таштап, «кимдир бирөөгө айтсаң, таап өлтүрүп кетебиз» деп коркуткан. Кыз эмне болгонун курбусуна айтып берген. Курбусу кыздын агасына чалган. Агасы болжолдуу кылмыш болгон жерлерди аныктап, май куюучу жайды жана шектүүлөрдүн бирин тапкан. Агасы карындашына чалып, ишти аягына чыгаруу керектигин, ал дайыма жанында болуп, коргой турганын айтып, арыз жазышы керектигин билдирген. Кыз макул болгон. Бир нече мүнөттөн кийин курбусунун көзүнчө терезеден боюн таштаган.
