6-сентябрда Нарын облусунун Кочкор районунда жаңы курулган аскер комиссариаттын имаратынын ачылыш аземи болуп өттү.
Заманбап эки кабаттуу бул имарат республикалык бюджеттин эсебинен кыска мөөнөттө курулуп бүткөрүлгөн. Имаратта аскер комиссариатынын толук кандуу иш алып барышы үчүн зарыл болгон бардык бөлмөлөр каралган. Салтанаттуу иш-чарага Улуттук коопсуздук мамлекеттик комитетинин төрагасы Камчыбек Ташиев, Коргоо министри Руслан Мукамбетов, аскер кызматчылары жана алардын үй-бүлөлөрү, ардагерлер, мамлекеттик органдардын өкүлдөрү жана жергиликтүү тургундар катышты.
Камчыбек Ташиев өзүнүн кайрылуусунда өлкө жетекчилиги улуттук жана аскердик коопсуздукту бекемдөөгө, ошондой эле аскер кызматкерлеринин кызмат өтөөсү үчүн татыктуу шарттарды түзүүгө өзгөчө көңүл буруп жатканын баса белгиледи. Иш-чаранын соңунда Камчыбек Ташиев аскер комиссарына ВАЗ-2121 «НИВА» автоунаасынын ачкычын, компьютердик техникаларды тапшырып, жаңы имараттын лентасын чечти.
