Мындан 2 ай мурун SEREPTV’га Кочкор районунун тургуну кайрылып, “Уурулар уул-келинимди арматура менен уруп, сейфти алып кетишти” деген. Сейфтин ичинде ири суммадагы акча болгонун айткан.
«7-январь түнкү саат 01:00-02:00 чамасы болчу. Келиним менен уулумду арматура менен жыга чаап, сейфти алып кетишти. Милиция келип, аракет кылып издеп жатышат. Уулумду жаткан жеринде эле чапкан деп жатабыз. Анан келиним ызылдай баштаганда аны чааптыр. Абалы адам чыдагыс болчу. Азыр алар Бишкекте. Экөө тең операция болду», — деген эле.
ИИМ 25-январда маалымат таратып, ошол окуяга тиешеси бар делген шектүү кармалганын билдирген. «Кылмышка шектүү делип, 1982-жылы туулган Нарын облусунун тургуну аныкталып, кармалды. Ал Нарын ОИИБдин тергөө кызматына жеткирилип, убактылуу кармоочу жайга киргизилди. Тинтүү учурунда кылмышкерден буюм далилдери алынган. Учурда кылмыш иши боюнча тергөө иштери улантылууда. Маалыматтарга ылайык, сейфте 500 миң сом акча каражаты болгон», — деп айтылган ИИМдин маалыматында.
Окуядан 2 ай убакыт өтүп, “Келиним алган оор жаракатынан улам эсине келбей көз жумду. Уурулукка шектүү адам кармалды. Ал уул-келинимдин жакын санаалашы экен. Шектүү бул ишти жалгыз өзү кылган эмес деп ойлойм. Окуяга тиешеси бар адамдардын жаза алышын суранабыз” дейт Кайырбек Сарматов.
«7-январдан 27-февралга чейин Бишкектеги ооруканада комада жатты. Эсине келбей, бир сөз айтпай кете берди. Дарыгер экөөнү тең арматура менен 6 жолудан чапкан деп айтыптыр. 52 күн дегенде каза болду. 2 уул, 2 кызы калды. Жолдошу түгөйү жок, куда-кудагый кызы жок калды. 42 жашында жарыкчылык менен коштошту. Бизди багып жаткан кичүү уул-келинибиз эле. Айла жок. Адам көтөрөт экен. Сабыр кылайын дейсиң, карманайын дейсиң, анын да чеги бар экен. 2000-жылы келген үй-бүлөгө. Эшиктен кирип калчудай болуп жатам», — деди кайнатасы.
