Кечээ, 27-январдагы жыйында Конституциялык кеңешменин мүчөлөрү Баш мыйзамдын жаңы долбоорун жактырды. Бул тууралуу конституциялык кеңешменин төрагасы Бекбосун Бөрүбашев маалымат жыйында кабарлады.
Анын айтымында, айтылган сунуштар жана ойлор протоколго киргизилип, алардын үстүнөн дагы бир-эки күн иш алып барылган соң, акыркы вариант Жогорку Кеңешке өткөрүлөт.
Долбоордун акыркы варианты Жогорку Кеңешке түшкөндөн кийин парламент аны референдумга алып чыгуу боюнча демилге көтөрүшү керек болот.
Белгилей кетсек, Баш мыйзамдын жаңы долбоору 118 беренеден турат.
