Ысык-Көлдөгү эс алуучу жайда каза болгон жигиттин өлүмү боюнча кылмыш иши козголгон.
Социалдык тармактарда маркумдун агасынын кайрылуусу жарыяланды. Анда ал иниси топ балдар тарабынан сабалган соң, 8 сааттан кийин каза болгонун айтып чыккан.
СЕРЕП МЕДИА маалымат агенттиги маркумдун жакыны менен байланышып, маалымат алдык.
«Келинчеги кош бойлуу. Өзү атасыз чоңойду. Байкушум «Баламдын атасы болот» деп сүйүнүп жүргөн. Мамлекеттик архивде иштечү. Өзү IT тармагын бүтүргөн. Негизи адамга зыяны жок жигит болчу. Уруш-мушташ эмнеден чыкканын билбейм. Менимче жумушчулар буларга тийишкен окшойт. Өзү покровкалык. Сөөгү айылына жерге берилди»,- деди ал.
Бул боюнча милиция маалымат таратып, 24 жаштагы жигиттин каза болгону тууралуу маалымат милицияга 16-август күнү саат 10:25 чамасында түшкөнүн билдиришти.
«Аталган факты катталып, Кылмыш-жаза кодексинин 130-беренеси менен кылмыш иши козголуп, тийиштүү экспертизалар дайындалган. Кылмыш ишинин алкагында шектүү катары 2011, 2008 жана 2006-жылы туулган жарандардын өздүгү аныкталып кармалып, Тергөө кызматына жеткирилген. Соттун чечими менен шектүү жарандарга карата камакка алуу баш коргоо чарасы тандалып, эки айга камакка алынган. Азыркы учурда тергөө амалдары уланууда»,- деп айтылат маалыматта.
Ысык-Көл ОИИБ маалымат берип, мушташтан кийин жигит милицияга арыз жазуудан баш тартканын билдирди.
«Алган жараатын аныктоо максатында райондук ооруканага жеткирилген. Жардам көрсөтүлүп, жигит менен анын кесиптешти ооруканадан чыккан. Ал Чолпон-Ата шаарын билбей турганын айтып, эс алуучу жайга жеткирүүнү суранган»,- деп айтылат маалыматта.
