Бүгүн, 20-марттагы Жогорку Кеңештин жыйынында депутаттарды шайлоо тартибин өзгөртүү боюнча демилгеленип жаткан мыйзам долбоорунун талкуусунда депутат Кубанычбек Самаков бул мыйзам кабыл алынса, регионалдык баланс сакталарын айтты.
«Эмнегедер биз гендер жагына гана талашып-тартышып жатабыз. Бул мыйзамдын маанилүү тарабы бар, бул мыйзам менен эмкиде регионалдык балансты камсыздап берет. Мисалы, Нарын же Ысык-Көл облусунда болгону 2 депутат бар. Бул мыйзам менен Нарындан 6 депутат чыгып жатат. Парламенттеги регионалдык балансты алып келип, түндүк-түштүк деген түшүнүктү жоготкону жол ачып берип жатат», — деди Самаков.
Депутат шайлоочунун санын 150 миңге жеткирүү үчүн аймактык бириктирүү болсо, ал элди экиге бөлүп жарылууга жеткирерин кошумчалады. «Мисалы Балыкчы менен Кочкор району кошулуп калса, бир адамга бир жаран добуш берет деген түшүнүк иштебей калат. Кайра экиге бөлүп жаруу пайда болот», — деди Самаков.
Эл өкүлү бир добушту 3 талапкерге колдонуу боюнча сунушун билдирди.
