Улукбек Ырысбек уулу мындан 1 жыл мурда онлайн казиного азгырылып 6 миллион сом уттурганын айтат. Ал кумар оюнуна апасынын 8 жыл иштеп тапкан акчасына алынган үйдү сатып, акчаны салганын айтат. Бул видеодо ал эмне үчүн бийик имараттан боюн таштайын дегени тууралуу айтып берди.
«Менин карындашымдын 4 жаштагы кызы жоголуп кеткен. Эки күндөн кийин табылган. Мен ошондо стресс болуп, жумушта иштебей калгам. Анан иштегим келбей жүрүп калдым. Уюлдук телефон сатып иштечүмүн. Тааныштар сатканы келгенде «онлайн казиного акчабызды уттуруп алдык» дешет эле. 4-5 жыл аларга «ойнобогула» деп жүрдүм. Анан өзүм кирип кеттим. Мага бир таанышым карыз болуп калган. Аны издеп барып, ошол жерде отуруп калдым. Бир аз ойноп көрдүм. 1 жыл аралыгында 1 миллион сом уттуруп жибердим.
Башында акчамды кайра чыгарып жаттым. Уттуруп, утуп жаттым. Анан чоң сумма утуп алганыңды айтканда андан да соң сумма коюш керек болуп калат. «Болду, токтоктом» дедим. 1 миллион сом апам үйгө деп чогулткан 6 миллион сомдун бир бөлүгү болчу. Апам Казакстанда 7-8 жыл иштеп, чогулткан акча болчу. «Чогуу жашайлы» деп алган үйүн мен сатып, ката кетирип, үйсүз калдым. 6 миллион сомду 1 айдын ичинде уттуруп жибердим. Апам динди түшүнгөн аял болгондуктан «Бул сенин тагдырыңа жазылган, капа болбо» деп айтты»,— деди ал.
