Курулуш, архитектура жана турак жай-коммуналдык чарба министрлигине караштуу Шаар куруу жана архитектура департаментинин Бишкек шаардык башкармалыгы социалдык тармактарда Октябрь районуна караштуу Орто-Сай айылындагы көрүстөн менен 4 кабаттуу курулуш объектисинин ортосундагы аралык боюнча туура эмес маалыматтар тарап жаткандыгына байланыштуу төмөнкүлөрдү маалымдайт.
Бишкек шаардык башкармалыгы курулуш объектилерине уруксат берүүдө тиешелүү мамлекеттик органдар тарабынан берилген расмий документтерге жана архивдик материалдарга таянуу менен иш жүргүзөт.
Атап айтканда, Таш-Төбө айыл өкмөтү тарабынан 2018-жылы берилген расмий маалымкатта аталган аймактагы көрүстөн жабык деп көрсөтүлгөн. Ушул документтин негизинде жана мыйзамда белгиленген тартипте долбоордук материалдар каралып чыгып, тиешелүү жол-жоболордон өткөндөн кийин гана курулуш иштерин жүргүзүүгө уруксат берилген. Мындан улам аталган аймактын Иманалиев көчөсүндө 4 кабаттуу турак үйдүн курулушу 2024-жылы башталган. Ошондой эле санитардык эрежелерге ылайык, жабык деп эсептелген көрүстөндөргө карата санитардык коргоо аралыгы, эреже катары, 50 метрден кем болбоого тийиш.
Жүргүзүлгөн топографиялык өлчөөлөрдүн жыйынтыгына ылайык, курулуш объектиси менен көрүстөндүн ортосундагы аралык орточо 60-70 метрди түзөт. Ушуга байланыштуу социалдык тармактарда айтылып жаткан “Курулуш көрүстөндөн 30 метр аралыкта жайгашкан” деген маалымат чындыкка дал келбей турганын белгилейбиз. Мындан тышкары, бүгүнкү күндө аталган көрүстөндүн жабык болуп кайрадан пайдаланылып жатканы тууралуу маалыматтар коомчулукта кошумча суроолорду жаратууда. Белгилей кетсек, көрүстөндүн статусун аныктоо, аны жабуу же пайдаланууга берүү маселелери жергиликтүү өз алдынча башкаруу органдарынын компетенциясына кирет. Ал эми Бишкек шаардык шаар куруу жана архитектура башкармалыгы тарабынан курулушка уруксат берүүдө ошол учурда күчүндө болгон расмий документтердин негизинде жана мыйзам талаптарына ылайык гана иш жүргүзүлгөн.
