Казакстандын Алматы шаарында казак элинин көрүнүктүү акыны, жазуучу, драматург жана коомдук ишмер Мухтар Шаханов менен коштошуу зыйнаты өттү.
Акыркы сапарга узатуу зыйнатына Кыргыз Республикасынын расмий делегациясы, тактап айтканда, президенттин кеңешчиси Чолпонбек Абыкеев, Жогорку Кеңештин депутаты Салтанат Аманова, Маданият, маалымат жана жаштар саясаты министринин орун басары Марат Тагаев, Жазуучулар союзунун төрагасы Каныбек Иманалиев, мамлекеттик жана коомдук ишмер Кемел Ашыралиев, Кыргыз эл жазуучусу Асан Жакшылыков, Кыргыз эл акыны Кожогелди Култегин, «Кыргыз тили» коомунун президенти Райымжан Курбанов ж.б. катышты.
Иш-чаранын жүрүшүндө Чолпонбек Абыкеев президенттин атынан көңүл айтуу катын окуп берип, маркумдун жакындарына жана жалпы казак элине терең кайгыруу менен көңүл айтты. Анда Мухтар Шахановдун чыгармачылык мурасы, анын адамдык бийик сапаттары жана кыргыз-казак элдин достугун чыңдоого кошкон салымы өзгөчө белгиленди. Анын терең философияга сугарылган чыгармалары, адамзаттык баалуулуктарды даңазалаган поэзиясы жана жарандык позициясы кийинки муундар үчүн руханий багыт, түгөнгүс казына бойдон кала берет. Акындын калеминен жаралган ар бир сапта улут тагдыры, адамдык нарк-насил, адилеттик жана чындыкка болгон умтулуу даңазаланат. Ошондуктан анын чыгармачылыгы убакыт өткөн сайын маанисин жоготпостон, тескерисинче, жаңы доорлордо кайрадан ачылып, окурмандардын аң-сезимине терең таасир этүүнү улантат.
Мухтар Шахановдун ысымы жана мурасы түрк дүйнөсүнүн руханий биримдигин чыңдоого кызмат кылып, элдер ортосундагы достуктун, маданий жакындык менен өз ара түшүнүшүүнүн символу катары да түбөлүк жашай берет.
Маалымат катары: Мухтар Шаханов — советтик жана казакстандык адабияттын ири өкүлдөрүнүн бири, Казакстан Республикасынын Парламентинин Мажилисинин мурдагы депутаты, коомдук-саясий ишмер. Казакстандын Эмгек Баатыры. Казакстандын Эл жазуучусу, ошондой эле Кыргыз Республикасынын Эл акыны наамдарынын ээси болгон.
