23-апрелде Бишкек шаарында «Кыргызстан – аймактык хаб: Континенттерди бириктирүүчү» аттуу эл аралык транспорттук форум өтөт.
Форумга Шанхай кызматташтык уюмунун (ШКУ) мүчө мамлекеттеринин транспорт министрлери, Түрк мамлекеттер уюмунун (ТМУ) транспорт министрлери, ошондой эле чет мамлекеттердин тиешелүү ведомстволорунун өкүлдөрү, эл аралык уюмдар жана финансылык институттар, илимий мекемелердин өкүлдөрү катышары күтүлүүдө.
Форумдун күн тартибинде аймактагы эл аралык транспорттук-логистикалык коридорлордун ролу, аларды континенттерди байланыштыруучу негизги звено катары кароо, ошондой эле транспорттук ташууларды өнүктүрүүдөгү мааниси талкууланат.
Атап айтканда, төмөнкү маселелер каралат:
- Транспорт тармагындагы ташуу процесстерин санариптештирүү, анын ичинде жол жүрүү убактысын кыскартуу, чечим кабыл алуу процесстерин жакшыртуу жана чыгымдарды оптималдаштыруу;
• Транспорттук коридорлордун боюндагы инфраструктуралык долбоорлорду ишке ашыруу, өз ара байланыштуулукту камсыз кылуу жана инфраструктураны өнүктүрүү;
• Транспорттук коридорлор аркылуу чек арадан өтүү жол-жоболорун жөнөкөйлөтүү;
• Транспорт тармагындагы проблемалуу маселелер жана аларды чечүү жолдору.
Форумдун алкагындагы маанилүү иш-чаралардын бири – Шанхай кызматташтык уюмуна мүчө мамлекеттердин транспорт министрлеринин 13-жыйыны. Бул жыйындын негизги максаты – катышуучу өлкөлөр ортосундагы транспорттук кызматташууну өнүктүрүү, мурда кабыл алынган демилгелерди ишке ашыруу жана мындан аркы биргелешкен аракеттерди координациялоо болуп саналат.
Кыргызстандын демилгеси – эл аралык автомобиль ташууларга берилүүчү уруксат кагаздарын санариптештирүү, маалыматтык технологияларды колдонуу менен «e-permit» системасын киргизүү, ошондой эле бул боюнча меморандумга кол коюу сунушталууда. Бул маселе Кыргызстандын ШКУга төрагалык кылуу мезгилиндеги кызматташуунун артыкчылыктуу багыттарынын бири.
Жыйындын жүрүшүндө ШКУга мүчө мамлекеттердин транспорт тармагындагы кызматташуусун өнүктүрүү боюнча атайын жумушчу топ тууралуу Жобонун долбоорун кабыл алуу пландалууда.
Мындан тышкары, Форумдун алкагында Түрк мамлекеттер уюмуна мүчө өлкөлөрдүн транспорт министрлеринин 9-жыйыны өтөт. Жыйындын жүрүшүндө мамлекеттердин өз ара байланышын күчөтө турган жана алардын транспорт коридорлорунун атаандаштыкка жөндөмдүүлүгүн арттыра турган аймактык логистикалык архитектуранын негизги элементтери, Каспий деңизи аркылуу жүк ташуулардын көлөмүн көбөйтүү боюнча демилгелер, темир жол байланыштарын өнүктүрүү, ошондой эле e-CMR электрондук системаларын киргизүү маселелери каралат. Соңунда кызматташуу тууралуу меморандумга кол коюу күтүлүүдө.
