Кыргызстан Тажикстандан келип окуган студенттер үчүн чек араны ачты. Бул тууралуу Министрлер кабинетинин төрагасынын орун басары Эдил Байсалов соцтармактагы баракчасына жазып чыкты.
«Жаңы Министрлер кабинетинин биринчи чечимдеринин бири — биздин университеттерде окуган тажикстандык студенттер үчүн чек араны ачуу. Бул бир тууган эки элдин ортосундагы достуктун жана ынтымактын эң бекем көпүрөсү», — деп жазды ал.
21-майдан тарта Тажик жарандарынын Кыргыз Республикасынын аймагы аркылуу кирүүсүнө, чыгуусуна, өтүүсүнө жана транзит менен өтүүсүнө убактылуу чектөөлөр киргизилген. Мамлекеттик чек аранын кыргыз-тажик бөлүгүндө жайгашкан өткөрүү пункттарында товарларды жана транспорт каражаттарын Тажикстанга өткөрүүгө тыюу салынган. Чек ара эки өлкөнүн дипломатиялык өкүлчүлүктөрүнүн кызматкерлери жана алардын үй-бүлө мүчөлөрү, ошондой эле чет мамлекеттердин, эл аралык уюмдардын дипломатиялык өкүлчүлүктөрүнүн кызматкерлери жана алардын үй-бүлө мүчөлөрү үчүн гана ачык болчу.
