"Мамлекеттик кадастрдын расмий маалыматтарын карап чыктым. Сандык көрсөткүчтөр башкача көрүнүштү көрсөтөт". Бул тууралуу депутат Дастан Бекешев соцтармактагы баракчасына билдирүү жарыялады.

2025-жыл жана 2026-жылдын 1-чейрегинде чет өлкөлүк жарандар Кыргызстанда 2 408 кыймылсыз мүлк объектисин сатып алышкан.

Эң көп сатып алган өлкөлөр:
Орусиянын жарандары — 1 238 келишим.
Казакстандын жарандары — 424 келишим.
Кытайдын жарандары — 311 келишим.
Түркиянын жарандары — 145 келишим.
Германиянын жарандары — 56 келишим.

Демек, Кытай жарандары биринчи эмес, үчүнчү орунда.

Кытай жарандары боюнча өзүнчө:
2025-жылы — 272 келишим;
2026-жылдын 1-чейрегинде — 39 келишим;
жалпысы — 311 келишим;
жалпы аянты — 32 540 чарчы метр.

Анын ичинен жер тилкелери — 4 260 чарчы метр. Бул 0,426 гектар, башкача айтканда, жарым гектардан да аз.

Масштабды түшүнүү үчүн: 2025-жылы Кыргызстанда кыймылсыз мүлктү сатып алуу-сатуу боюнча 62 миңден ашык келишим болгон. Кытай жарандарынын үлүшү болжол менен жалпы рыноктун 0,44%ын түзөт. Ошондуктан “кытайлар баарын сатып алып жатат” деген пикир расмий маалыматтар менен тастыкталбайт.

Бирок бул мамлекет көз жумуп коюшу керек дегенди билдирбейт. Туруктуу жана ачык мониторинг зарыл: ким сатып алып жатат, кайсы аймактан сатып алууда, бир адамда канча объект бар, стратегиялык же чек ара аймактарында сатып алуулар барбы, ортомчу адамдар колдонулуп жатабы — мунун баары көзөмөлдө болушу керек.