Буга чейин социалдык тармактарда «дарыгерлер балама биринчи жардам көрсөтө албай жатышат» деген эненин видеосу тараган. Анда эне баласын ооруканага алып келгенин, ооруканадагы дарыгерлер биринчи жардам да көрсөтө албай жатканын айтып, дарыгерлерди урушуп жатканын көрүүгө болот. Ал ошондой эле дарыгерлерди уйкусу ачылбайт деп айыптап, «Бул жерде эшек такалап отурасыңарбы же мал кайтарып отурасыңарбы?» деп жатканын угууга болот. Бул боюнча Саламаттыкты сактоо министрлиги жооп берди.
«1-май күнү таңга маал эне 17 жаштагы уулун такси менен Бишкек шаардык медициналык балдар клиникалык тез жардам ооруканасына алып барган. Кезметте турган дарыгерлер бейтапты кабыл алуу бөлүмүндө дароо кароодон өткөрүшкөн. Бейтаптын дем алуусу жана жүрөк согушу туруктуу болгону, бирок аң-сезиминде жай реакция (заторможенность) байкалганы белгиленген. Баланын абалына жараша ал дароо «Амбулатордук диагностика бөлүмүндөгү» шашылыш жардам кабинетине жеткирилип, кандын басымы жана кычкылтек деңгээли үчүн мониторлорго туташтырылган.
Ал учурда ооруканада бейтаптар көп болуп, медицина кызматкерлери күчөтүлгөн режимде иштеп жатышкан. Бирок баланын энеси өз эмоциясын кармай албай, катуу үн чыгарып нааразычылык билдирип, медицина кызматкерлеринин ишине тоскоолдук жаратып, агрессивдүү жүрүм-турум көрсөтө баштаган. Ал негизсиз түрдө дарыгерлерди уктап жатышат деп айыптап, видеого тартып, ооруканада каталка жок деп билдирген. Бирок медперсоналдын айтымында, ооруканада бир нече каталка жана носилка дайыма жеткиликтүү болгон жана бала алар менен алынып келмек. Бирок эненин агрессиясынан улам дарыгерлер өзүн жоготуп коюп, носилканы унутуп калышкан жана баланы кол менен көтөрүп барып, реанимацияга жеткиришкен.
Ошол маалда реанимация бөлүмүндө башка оор абалдагы бейтаптар болгондугуна карабай, реаниматолог дарыгер баланын энесинин кыйкырыгына, кемсинтүүсүнө жана видеого тартуусуна карабай, ыкчам медициналык жардам көрсөткөн. Бир нече адистин катышуусунда балага текшерүү жүргүзүлүп, тийиштүү дарылоо берилген. Алгачкы кароонун негизинде баланын абалы реанимацияда кармоону талап кылбаганы аныкталган. Ага кусууга каршы дары сайылып, хирургиялык патология четтетилген.
Абалы турукташкандан кийин бала рентген текшерүүдөн өтүп, андан кийин кайрадан кыска мөөнөттүү дарылоо бөлүмүнө жаткырылып, дарылоо ошол жакта уланган. Бейтаптын абалы канааттандырарлык деп бааланган. Ошого карабастан, эне кыска мөөнөттүү дарылоо бөлүмүндө да чыр-чатактуу жүрүм-турумун улантып, коридордо катуу сүйлөп, медицина кызматкерлеринин кадыр-баркын кемсинткен жана алардын аброюна шек келтирген.
Балага “ашказандын функционалдык бузулушу” деген диагноз коюлган – бул убактылуу абал болуп, кусуу, ашказанда оордук же оорутуу менен коштолот. Мындай абал көбүнчө стресс, туура эмес тамактануу же инфекциялардан кийин пайда болот. Кийинчерээк эне уулуна энергетикалык суусундук алып келип берген. Саат 10:00 чамасында ооруканага түшкөндөн беш саат өткөн соң, бейтап врачтар тарабынан кайрадан текшерилип, абалы турукташканына байланыштуу эненин каалоосу менен үйүнө чыгарылган. Бул убакыт аралыгында бала ооруканада тыкыр медициналык көзөмөлдө болгон.
Бул окуя боюнча дарыгерлер укук коргоо органдарына кайрылды. Тийиштүү органдарга өткөрүп берүү үчүн видеодалилдер бар. Оорукананын жетекчилиги медицина кызматкерлеринин ар-намысын жана кадыр-баркын коргоо максатында мамлекеттик органдарга кайрылууга аргасыз болду», — деп айтылат маалыматта.
Бул жерде эмне болгонун коргон жокмунго бирок мен балдарым ооруп калса коркуп кетип сразу больницага алып барам озум да ден соолугума байланыштуу коп бардым ото копол мамиле кылышат жалалабадагы психотерапевтке баргам кайра оорукчан кылып жаман болдум скорый чакыралабы деп коёт дагы. Бишкекте 3 балдар ооруканасына приёмныйга ыраазы болдум ото сонун карады.