«Фермерлерде күмөн саноо болбоо үчүн жеңилдетилген насыя берүүдө МИК сыяктуу электрондук кезек киргизиши керек». Мындай пикирин кечээ, 27-февралда “Айыл Банктын” фермерлерге жана ишкерлерге насыя берүү маселесин иликтөө боюнча убактылуу депутаттык комиссия жыйынтыктоочу отурумунда депутаттык комиссиянын мүчөсү, эл өкүлү Замирбек Мамасадыков билдирди.
Депутаттык комиссиянын Чүй, Ош, Жалал-Абад облустарында көчмө жыйындары өткөрүлгөн. Текшерүүнүн жыйынтыгында бардык облустар боюнча 324 кредиттик досье изилденген жана жеңилдетилген кредиттик каражаттарды максатсыз пайдалануу фактысы аныкталган эмес.
Отурумда айтылган маалыматка ылайык, былтыр жалпысынан 72 миң кардарга 35 миллиард 600 миллион сом насыя берилген. Банктын кредиттик портфели өсүп, 2024-жылы 51 миллиард сомго жеткен.
