Кечээ, 8-апрель күнү социалдык тармактын колдонуучулары эки жол тескөөчү жол тандабастын айдоочусун күч менен кармап жаткан видео менен бөлүшүшкөн. Окуя боюнча ИИМдин Чүй облусу боюнча жол коопсуздугун камсыздоо башкы башкармалыгынан маалымат беришти.
«Бишкек-Нарын-Торугарт унаа жолунун 53-чакырымында кызматкерлер жол коопсуздугун камсыздап жаткан. Саат 17:45 чамаларында Лексус 570 унаасын токтотушкан, бирок айдоочу кызматкерлерге баш ийбей, токтобой кеткен. Кызматкерлер артынан барып токтоткон учурда рулда 1985-жылы туулган жаран мас абалында унаа башкарып бара жатканы аныкталган.
Бул факты боюнча айдоочуга Укук бузуулар кодексинин 193-185-беренелерине ылайык протоколдор толтурулуп, унаасы айып короо жайына токтотулган»,— деп айтылат маалыматта.
