Жарандардын кайрылууларын эске алуу менен, такси ишин лицензиялоо мөөнөтү 2026-жылдын 1-июлуна чейин узартылган. Бул тууралуу ИИМден маалымдашты.
Бүгүнкү күндө 14 миңден ашуун жеке жактар жана 400дөн ашуун юридикалык жактар лицензия алышты.
Бирок убакыт өткөн сайын лицензия алууга кайрылган жарандардын саны азайганы байкалууда. Буга байланыштуу такси айдоочуларын акыркы күндөрдү күтпөстөн, тиешелүү иш кагаздарын алдын ала даярдап, лицензияны ыкчам алууга чакырабыз. Азыркы учурда ИИМдин Жол кыймылынын коопсуздугун камсыздоо башкы башкармалыгынын өлкө аймагындагы бардык бөлүмдөрүндө лицензия берүү улантылууда.
Негизги максат — такси кызматын жөнгө салуу, адам өмүрүн сактоо, жол кырсыктарынын санын кыскартуу, техникалык кароодон өтпөгөн унаалардын такси катары иштөөсүнө тыюу салуу, ошондой эле айдоочулардын иш убактысын көзөмөлдөө болуп саналат. Урматтуу такси айдоочулары, мыйзамдуулукту сактап, лицензияны өз убагында алууга чакырабыз.
