Энергетика министрлиги «Бөлүштүрүүчү ишканалар үчүн электр энергетикасы чөйрөсүндөгү айрым маселелер жөнүндө» буйругуна өзгөртүүлөрдү киргизүү боюнча долбоорду коомдук талкууга чыгарды. Бул кабыл алынып жаткан чечимдер ачык жана коомчулуктун, ошондой эле бөлүштүрүүчү компаниялардын өкүлдөрүнүн катышуусу менен иштелип чыгып жатканын тастыктайт. Мамлекет бизнес жана жарандар менен диалогго ачык.
Буга чейин Энергетика министрлигине жеке бөлүштүрүүчү компаниялардын абоненттеринен бир нече жолу кайрылуулар түшкөн. Айрым жарандар кызмат көрсөтүүнүн сапатына жана аталган компаниялардын ишмердүүлүгүнө нааразычылык билдирип, мамлекеттик компаниялардын тейлөөсүнө өтүүнү каалашкан. Бул маселелер да көңүл бурууну жана ар тараптуу кароону талап кылат.
«Жеке компаниялар импорттук электр энергиясынын чыгымдарын жабууга мажбурлап жатат» деген билдирүүлөр чындыкка дал келбейт. Бирдиктүү тариф электр энергиясынын чыныгы наркын, анын ичинде импорттук жеткирүүлөрдү да эске алуу үчүн зарыл. Айрыкча күз-кыш мезгилинде тартыштык жаралып, башка өлкөлөрдөн электр энергиясын сатып алууга туура келет. Чыныгы чыгымдарды эске албоо тармакта карыздардын көбөйүшүнө жана каржылоонун жетишсиздигине алып келет.
Инвесторлор үчүн негизги факторлор — туруктуулук, түшүнүктүү эрежелер жана каржылык тартип. Тармактагы ачыктык канчалык жогору болсо, инвесторлордун жана рынок катышуучуларынын ишеними да ошончолук жогорулайт.
Белгилей кетсек, бардык өзгөртүүлөр мыйзамдын чегинде жана бардык тараптардын кызыкчылыктарын эске алуу менен ишке ашырылат. Бул чаралар энергетика тармагында көп жылдан бери топтолуп келген маселелерди системалуу түрдө чечүүгө багытталган.
