Билим берүү министрлиги Ысык-Көл облусунун Каракол шаарындагы Карасаев атындагы балдар лицейинин мугалими Азамат Нурматовдун Түркияда кармалгандыгы боюнча тараган маалыматтарга байланыштуу маалымат берди.
«Билим берүү жана илим министрлиги Түркиянын Анталия шаарында өтүп жаткан эл аралык математика олимпиадасына мектеп окуучуларынын катышуусуна жана алардын өлкөдөн чыгуусуна эч кандай тиешеси жок. Бул сапардын бардык уюштуруу маселелери, анын ичинде тандоо, коштоп баруу жана логистика маселелери жеке «Zeen Education» билим берүү компаниясы тарабынан жүргүзүлгөн.
«Zeen Education» компаниясынын директору Айнура Мамашариптин расмий маалыматына ылайык, 20-апрелде Кыргызстандан 36 окуучу, 4 ата-эне жана 3 мугалимден турган делегация олимпиаданын уюштуруучуларынын чакыруусу менен Анталия шаарына барышкан. Окуучулар ата-энелеринин нотариалдык макулдугу менен «Zeen» компаниясынын өкүлдөрүнүн коштоосунда сапарга чыгышкан. Ал эми окуучулар көзөмөлсүз же кароосуз калган деген маалымат чындыкка дал келбейт. Учурда окуучулар коопсуз шартта олимпиадага катышып жатышат, алардын Кыргызстанга кайтып келүүсү 25-апрелге белгиленген. Компаниянын өкүлдөрү бүткүл сапар бою балдарды коштоп жүрүшөт жана көзөмөлдү камсыз кылышууда.
Билим берүү жана илим министрлиги кырдаалга байкоо салып, Тышкы иштер министрлиги жана Кыргызстандын Түркия Республикасындагы элчилиги менен байланышта болууда»,- деп айтылат маалыматта.
