Нарында аш берүүнүн ордуна кайрымдуулук кылынды. Бул тууралуу Муфтияттан билдиришти.
Маалыматка караганда, Айбек Куланбаев аттуу Нарын шаарынын тургуну өткөн жылы дүйнө салган апасы Бейшеке кызы Ишебүбүнүн жылдык ашына сарпталуучу каражатты кайрымдуулукка жумшаган. Ал атасы, уул-кыздары, күйөө балдары менен кеңешип, ашка кетүүчү каражатты Нарын шаарындагы “Юсуф Сыдык” атындагы балдар медресесинин оңдоо иштерине тапшырып берген.
“Апабыздын ашын берип койсок деле болмок. Бирок атам, бир туугандарыбыз менен кеңешип, апабызга дайыма багышталып турчу соопчулук кылалы деп бир чечимге келдик. Анан карап көрсөк, Куран, хадис илимин алып жаткан балдар медресесинин оңдоо иштери болуп жаткандыгын билип, атабыздын чечими менен ушул жакка берүүнү туура көрдүк”, – деди Айбек Куланбаев.
Облус казысы Эрик Молдокулов каражатты медресенин мүдүрүнө толук тапшырып берди. Андан соң апага Куран багыштап, бата кылды.
