Эртең, 17-апрелде түнкүсүн Нарын облусунун айрым жерлеринде жаан жаап, күн күркүрөшү, бийик тоолуу райондордо кар жаашы күтүлөт, Ысык-Көл облусунда жаан-чачын күтүлбөйт. Бул тууралуу ӨКМден билдиришти.
18-апрелде көпчүлүк аймактарда жаан жаап, күн күркүрөшү, бийик тоолуу райондордо кар жаашы, түнкүсүн Ысык-Көл облусунун айрым жерлеринде жаан-чачын катуу жаашы күтүлөт.
19-апрелде көпчүлүк аймактарда жаан жаап, күн күркүрөшү, бийик тоолуу райондордо кар жаашы мүмкүн, түнкүсүн айрым жерлерде жаан-чачын катуу жаайт.
Бийик тоолуу райондордо жолдор тайгак болот. Батыштан соккон шамалдын ылдамдыгы секундасына 4-9 метр, 17-18-апрелде айрым жерлерде 15-20 метрге, Ысык-Көл акваториясынын батыш тарабында 19-24 метрге жетиши күтүлөт.
«Ысык-Көл жана Нарын облустарында болжолдонгон аба ырайынын шарттары Борбордук Азиянын батыш жана түштүк-батыш райондорунан келген аба агымдарына байланыштуу. Бул түрдүү синоптикалык процесстер чыгыш жана түштүк-чыгыштан келген аба агымдарынын Кыргызстандын территориясына келишин жокко чыгарат. Ошондой эле, Борбордук Тянь-Шандын тоо кыркалары Кыргыз Республикасына чыгыш жана түштүк-чыгыш багытынан келген аба массаларынын киришине чоң тоскоолдук кылуусун эске алуу абзел. Андыктан Кыргызстандын чек арасында жана Ысык-Көл облусунун аймактарында катуу бороон болот деген маалымат чындыкка дал келбей турганын билдиребиз»,- деп айтылат маалыматта.
