Айыл чарба министрлиги өлкөдө малды жасалма уруктандыруу пункттарын ачууну пландап жатат. Бул боюнча министрлик атайын долбоор иштелип чыкканын да билдирди.
Министрлик долбоорду өкмөттүн кароосуна киргизген. Сунушталган долбоору жүзөгө ашып калса, азык-түлүк коопсуздугун камсыз кылуу маселесин натыйжалуу чечүүгө өбөлгө болору айтылат.
«Азыркы мал чарбасынын шарттарында табигый жол менен төл алуу дайыма эле кепилденген эмес. Уйларды бука менен куудуртуу учурунда трихомоноз, бруцеллез же вибриоз инфекциялык ооруларын жуктуруп алышы мүмкүн. Бул көйгөйлөрдүн баарын жасалма уруктандыруу аркылуу жоё алабыз. Ал гана эмес тууттун так мөөнөтүн, ошондой эле алган төлдүн сапаттык өзгөчөлүктөрүн да камсыз кылат. Жасалма уруктандыруу менен багылып жаткан малдын асыл тукумдук жана азыктык сапатын жакшыртууга болот», — деп жазылган долбоордо.
