Бишкекте жеке клиникада сакал эктирүү үчүн операция жасатып жаткан маалда 30 жаштагы хирург-флеболог Элдос Турсунбеков күтүүсүз каза болгон. Бул тууралуу SEREPTV телеканалына анын жакындары билдиришти. “Уулум сакал эктирем дегенде “жөн эле койбойсуңбу” дегем. Мынчалык оор операция экенин билген эмесмин. Артында жубайы, баласы калды. Тиешелүүлөр жазасын алсын” дейт маркумдун атасы.
«Биз 2015-жылы баш кошконбуз. Быйыл чогуу жашаганыбызга 8 жыл болмок. 8-майда саат 13:00дө клиникада болуп калышы керек болчу. Мен чалган жокмун. Анткени операция 4-5 саат болорун билчүмүн. Таанышы болгон үчүн сүйлөшүп, балким андан да көп убакыт кетет деп ойлодум. Өзү чалат деп күттүм. Бирок чалган жок. Казань шаарында 23:00 болду, Бишкекте түнкү саат 2. Жазам, чалам жооп бербейт. Үйдөгүлөрдү карай баштадым. Атам WhatsApp’ка 2 мүнөт мурун кириптир. Түн болуп кеткени үчүн уялдым бирок жүрөгүм чыдабай жаздым. Атам окуп, жооп берген жок. Анан уялбай эле чала баштадым. Алган жок. Бир маалда апам алып эле, Элдостун ооруп калганын, реанимацияда экенин айтты. «Сен балаң менен билет алып келе бер» деди. 9-майга билет алдым. Учуп келдим. Бирок ичимден сезип жаттым. Анткени 6 жыл сүйлөшүп, баш кошконбуз. Бири-бирибизди сезип калганбыз. Келип эле боз үйдү көрдүм. Ишенгим келген жок. Ишенүү, анын жоктугу мага өтө оор болуп жатат. Уулубуз бар. Көпкө күткөн балабыз. Биз аны 5 жыл күттүк. Азыр баламдын тили чыкпай калбасын, коркуп калбасын деп уулума эч нерсе билгизбей, көп ыйлабай жүрөм. Мени азыр балам эле кармап турат. Психикасын бузуп албайын деп карманып жатам»,- деди жубайы.
