Кечээ, 14-мартта Ош шаарындагы Курманжан датка көчөсү менен кесилишкен Навои көчөсүнөн баштап, Айтиев көчөсүнө чейинки аралыкка кызыл жалбырактуу клён дарагынын көчөттөрү отургузулду. Бул тууралуу Ош мэриясынан билдиришти.
Көчөттөр бүчүр байлап, өсүшү үчүн алар өзүнүн топурагы менен кошо алып келинген. Ар биринин баасы 200-250 долларды түзөт. Дарактарды отургузууга Ош шаарынын мэри Жеңишбек Токторбаев, шаардык кеңештин депутаттары, жашылдандыруу чарба комбинатынын кызматкерлери, ЖМКнын өкүлдөрү катышып, көчөт тигишти. Ош шаарынын сырткы көрүнүшүн, климаттык абалын жакшыртуу максатында шаар көчөлөрүнө мындан тышкары ясень, катальпа, акация сыяктуу бак-дарактар отургузулуп, 140 миң түп роза менен көрктөндүрүлөт.
