Ошто 12-апрелде Навои көчөсүндө жол боюндагы үйлөр буздурулуп жатканда 11 жашар кыз жаракат алган. Бул тууралуу «Клооп» жазып, сүрөт менен бөлүшкөн. Фактыны СЕРЕП МЕДИА маалымат агенттигине Ош ШИИБ дагы тастыктады.
Кыздын таенесинин айтымында, мэриянын кызматкерлери үйдү бузууга келгенде кыз үйдө жалгыз болгон. «Мен ооруканада болуп, үйдө жок элем. Кошуналар “бул үйдө жашаган аялдын майыптыгы бар, жолдошу да, эркек баласы да жок. Азыр үйүндө жок экен тийбегиле, күтө тургула” дешкен экен. Бирок ага карабастан бузушуптур. Ошол учурда канализациянын жанындагы суу атылыптыр. Үйдө 11 жаштагы неберем калган. Ал сууну жабам деп жатканда, башына бир, колуна дагы бир кум блок түшүп кетип, эс-учун жоготуп коюптур», — деди ал.
«Ишти жүргүзгөн бардык кызматкерлерге жана бригадирлерге атайын тергөө кызматы тарабынан чакыруу берилген. Алардан сурак алынып, окуянын чоо-жайы такталууда. Учурда соттук-медициналык экспертиза дайындалып, кыздын жаракаттары аныкталууда», — деп айтылат маалыматта.
