Соцтармак колдонуучусу Амантур Абдыкалыков Кыргыз Республикасынын жаңы жарандык паспортуна байланыштуу айрым чет өлкөлөрдө көйгөй жаралып жатканын айтып чыккан. «Жаңы паспорттун сүрөт бар жери пластик экен, анан сканерден өткөрүүдө Түштүк Кореяда, Малайзияда, Японияда көйгөй жаралууда. Кокус каттамга кечигип жаткан болсоңор, кыйналып калчудайсыңар. Ким жаңы паспорт алган болсо, аэропортко эрте келип, эрте каттоодон өткүлө», — деп кеңеш берген ал.
Жогорудагы кайрылуу соцтармакта талкууга алынып жаткан учурда «Кызмат» мамлекеттик мекемеси 2025-жылкы үлгүдөгү Кыргыз Республикасынын жарандык паспорттору белгиленген тартипте 192 өлкөдө легалдашканын, бул Кыргыз Республикасынын Тышкы иштер министрлигинин расмий катында (№ 13-025/21186, 20.10.2025) тастыкталганын билдирди.
«2025-жылкы үлгүдөгү Кыргыз Республикасынын жалпы жарандык паспортторун берүү 2025-жылдын 3-ноябрынан башталган. Белгиленген паспорттор коргоо деңгээли жагынан жеке менчик документтерге коюлган бардык талаптарга жооп берет жана Эл аралык жарандык авиация уюмунун (ИКАО) сунуштарына ылайык сапат жана коргоо деңгээли боюнча талаптарга жооп берет.
Бүгүнкү күнгө чейин «Кызмат» мамлекеттик мекемеси Кыргыз Республикасынын Тышкы иштер министрлигинин Консулдук кызмат департаментинин өкүлдөрү менен Кыргыз Республикасынын жарандары мамлекеттик чек арадан өтүүдө кездешиши мүмкүн болгон мүмкүн болгон көйгөйлөрдү аныктоо максатында сүйлөшүүлөрдү өткөргөн. Бул маселе боюнча дипломатиялык өкүлчүлүктөргө кайрылуулар түшө элек. Жалган маалыматтарды таратпоону өтүнөбүз», — деп жазылат мамлекеттик мекеменин маалыматында.
Буга удаа эле Амантур Абдыкалыков SEREP MEDIA маалымат агенттигине байланышып, биринчи жарыяланган видео боюнча түшүндүрмө берип өттү.
«Паспорт боюнча видео резонанс болуп кетти. Паспорт өтпөй жатат эмес, бул сканерден өткөрүү учурунда ошондон өтпөй калып жатат. Кагаз өтүп, пластик автоматташтырылган сканерден өтпөй калууда. Жаман деген жокпуз. Балким, сканерлер эски болуп жаткандыр», — деди ал.
