Ноокат районунда көмүр кенин казган ишкана жылгаларды таш, топурак менен толтуруп салган. Ал сел коркунучун жаратып жатат. Бул тууралуу Жогорку Кеңештин бүгүнкү, 12-февралдагы жыйынында эл өкүлү Рустамбек уулу Советбек айтып чыкты.
Депутат: «Ноокаттын Зулпуев айыл өкмөтүнүн Жатан айылында «Көмүр» деген ишкана кен казат. Күз айларынан бери техникалык коопсуздукту сактабай, таш, топуракты коктуларга толтуруп жатат. Жылгалар жабылып калыптыр. Өтө чоң коркунучту пайда кылууда. Мурда ал жылгалардан суу агып, сел болчу. Бул коркунуч жаз айлары жакындаган сайын күчөйт», — деди.
Эл өкүлү Рустамбек уулу Советбек аталган жылгалар ачылбаса, нөшөрлөгөн жамгырда суу чогулуп, сел жүрсө айылдагы 120 үй суу астында калаарын кошумчалады.
«Тоонун үстүндө, көмүр казып жаткан жерде 3 чоң жарака турат. Мага видео, сүрөттөрүн жиберишти. Ушул маселе боюнча тиешелүү министрликтерге тапшырма берилсин, текшерилсин. Керек болсо кен казуу токтотулсун. Кечиктирбей астын алалы, эртең кеч болуп калбасын», — деди Рустамбек уулу Советбек.
This is a modal window.
