Президент Садыр Жапаров бүгүн, 30-августта Жалал-Абад облусуна болгон жумушчу сапарынын алкагында Мамлекеттик ипотекалык компания тарабынан Жалал-Абад шаарында курулган турак жай комплексинин ачылышына катышты.
Салтанаттуу аземдин алдында мамлекет башчысы Жеңи-Жок көчөсүндө курулуп жаткан «Асман Резиденс-3» турак жай комплексинин курулушунун аякташы менен таанышты. Тогуз кабаттуу үйдүн курулушу өткөн жылдын март айында башталган. Батирлердин жалпы саны 135ди түзөт. Жертөлө кабатында кампалар жана унаа токтотуучу жай каралган. Имараттын фасады сары таш жана керамограниттен жасалган. Турак жай комплексинин аймагы жашылдандырылып, көрктөндүрүлгөн.
«Асман Резиденс-2» турак жай комплексиндеги батирлердин ачкычын тапшыруу аземинде Садыр Жапаров өлкөбүздү өнүктүрүүнү аймактардан баштоо мамлекеттик саясаттын негизги өзөгү болуп саналарын баса белгиледи. Ушул тапта Кыргызстандын жети облусун тегиз өнүктүрүүгө өзгөчө көңүл бурулууда. Аймактарды өнүктүрүүдөгү эң натыйжалуу жана таасирдүү багыттардын бири катары жергиликтүү тургундарга жеткиликтүү турак жай куруу өзгөчө мааниге ээ.
«Кыргыз элинин турмушунда үйлүү болуу – эң чоң жакшылыктардын бири. Ак өргөөлүү болуп жаткан жарандарыбыздын мындай сүйүнүчү Кыргызстандын эгемендигинин 34 жылдыгы менен дал келип жатканы өзгөчө эстен кеткис учур болуп калат», — деди президент.
Турак жай комплекси 5 тогуз кабаттуу блоктон турат жана 450 батирди камтыйт. Аймакта ошондой эле балдар жана воркаут аянтчалары, жер үстүндөгү жана жер астындагы унаа токтотуучу жайлар каралган. Мамлекет башчысы буга чейин турак жай программасынын алкагында алгачкылардан болуп Жалал-Абад шаарындагы «Асман Резиденс-1» жана Сузак районундагы «Асман Резиденс-5» турак жай комплекстери пайдаланууга берилгенин эске салды. Садыр Жапаров 2023-жылдан тарта мамлекет турак жай саясатынын стратегиясын өзгөртүп, жеткиликтүү турак жай курууга басым жасаганын айтып, өлкө эгемендүүлүк алгандан бери биринчи жолу мындай масштабдагы социалдык курулуш ишке ашырылып жатканын баса белгиледи. Бүгүн өлкө боюнча «Менин үйүм» мамлекеттик турак жай программасынын алкагында 70 миңден ашык батир курулуп жатат, анын ичинен 13 миңден ашууну Жалал-Абад облусунда.
«Аталган программа аркылуу биз жарандарыбызды үй-жай менен камсыз кылуудан сырткары, бир нече максаттарды ишке ашырып жатабыз. Алардын ичинде мамлекеттин курулуш тармагын өнүктүрүү жана инвестиция тартуу жолго салынды. Жер-жерлерде жаңы жумуш орундары түзүлүүдө. Аймактарыбыздын инфратүзүмдүк өнүгүүсү ыкчамдады. Жаш муундардын өз жеринде калып, иштөөсүнө шарттар түзүлдү», — деп белгиледи мамлекет башчысы. Сөзүнүн аягында Садыр Жапаров жаңы батир ээлерине үйлөрүндө тынчтык, мол ырыс-кешик жана бакубат турмуш орношун каалады. Андан кийин мамлекет башчысы көп жылдан бери мугалим болуп иштеген Жалал-Абад шаарынын тургуну Мария Жээнбаевага батирдин ачкычын тапшырып, андан соң батирлерди көрүп, жашоочулар менен баарлашты.
