Президент Садыр Жапаров 10-апрелде Бишкек шаарындагы «Технопарк» IT-хабынын ачылышына катышты.
Мамлекет башчыны IT тармагын өнүктүрүү жаатында алектенген Кыргызстандын Жогорку технологиялар паркынын колдоосу менен атамекендик программисттер жасаган БилимБот роботу мамлекеттик тилде саламдашып тосуп алды.
Борборду кыдыруу учурунда президентке IT-хабдын резиденттери, анын ичинде Кыргызстандагы соода жүргүзуүү, жумуш жана турак жай издөө боюнча эң ири сервис, продакшн компания, ошондой эле криптовалюталар рыногундагы автоматташтырылган соода платформасы тууралуу маалымат берилди.
Аянты 14 миң чарчы метр болгон IT-хаб 1500 жумушчу ордуна ылайыкталган. Креативдүү мейкиндикти курууга жана жабдууга жумшалган жалпы инвестициянын көлөмү 2 миллиард сомду түздү.
