Президент Садыр Жапаров кечээ, 6-ноябрда АКШга болгон иш сапарынын алкагында Вашингтон шаарында Президент Дональд Трамп менен сүйлөшүүлөрдү өткөрдү. Бул тууралуу президенттин администрациясынын басма сөз кызматы билдирди.
“Лидерлер эки тараптуу кызматташуунун актуалдуу маселелерин жана Кыргызстан менен АКШнын ортосундагы өнөктөштүктү талкуулашты. Анын ичинде саясий чөйрөдө, ошондой эле финансылык технологиялар жана жасалма интеллект жаатында бекемдөө жолдорун. Кыргызстан башка мамлекеттерден айырмаланып, мунай жана газ запастарына ээ эмес экенин айткан Мамлекет башчысы өлкөнүн башкы байлыгы – билимдүү жаштар экенин баса белгиледи. Алардын көбү IT-чөйрөсүн активдүү өздөштүрүп жатышат.
Ошондой эле каржы технологиялары жаатындагы кызматташтыкка көңүл буруп, АКШнын Президенти Дональд Трамп тарабынан кабыл алынган, дүйнөдөгү эң алдыңкы жана прогрессивдүү мыйзамдардын бири болуп эсептелген стейблкоиндерди жөнгө салуучу Genius Act мыйзамын белгиледи.
Президент Садыр Жапаров Кыргызстанда санариптик каржы инструменттерин киргизүү боюнча көрүлүп жаткан чаралар, анын ичинде улуттук стейблкоин — KGST ишке киргизүү жана мамлекеттик крипторезервди түзүү боюнча иштер тууралуу айтып берди”, — деп жазылат маалыматта.
Өз кезегинде АКШнын Президенти эки жактуу мамилелердин ырааттуу өнүгүп жатканын жана аны камсыздоого багытталган өз ара аракеттенүүнү мындан ары да өнүктүрүүгө өбөлгө түзөрүнө ишенимин билдирген.
