Актриса, режиссёр Ырыс Жоомартова 60 жаш курагында дүйнө салды. Жоомартованы акыркы сапарга узатуу зыйнаты бүгүн, 3-мартта өттү. Аны жакындары, сахналаш достору эскеришти.
СЕРЕП МЕДИА маалымат агенттиги Ырыс Жоомартованын каза болгонуна байланыштуу маркумдун жакындарына терең кайгыруу менен көңүл айтып, аза-кайгысын тең бөлүшөт.
«Ырыс ооруп калганын алгач эч кимге билдирген жок. Күлүп-жайнап, мурункудан да көп жолугуп калганбыз. Жашоого тойбой жашадыбы деп ойлойм. 1 жылдай болуп калды. «Ушундай ооруга кабылдым, бирок мен жеңип атам. Мен жеңем» деп ишеничтүү, үмүт менен айткан. Акыркы жолу операцияга кирип жаткан күнү сүйлөштүк. Видеого чыкпай койду. «Жазчы» деп туруп алды. Үнүн да угузган жок. Акыркы жолу жазышканда «80 пайызын жеңдим, өпкөмдөн суу алганы ийгиликтүү болду. Экинчисин алдырсам эле жакшынакай барып калам» десе аябай сүйүнүп, тиленгенбиз. Анан эле байланыша албай калдык. Москвада жүргөн эле. Ырыстай адам чанда кездешет. Айла жок, бейишин берсин дейли», — деди Салима Балтаева.
