Сары-Кыр ашуусунда калып калган жаранды эвакуациялоого ӨКМдин тик учагы учуп кетти.
Маалыматка ылайык, 5-ноябрда Жалал-Абад – Казарман унаа жолунун Сары-Кыр ашуусунда 30 жаштагы К.Э. аттуу жаран автоунаасы менен кар күрткүсүнө тыгылып, жардам сураган.
Кечээ бул ашууга ӨКМдин Жалал-Абад облустук башкармалыгына караштуу Тогуз-Торо райондук өзгөчө кырдаалдар бөлүмүнүн 4 куткаруучусу, 4 милиция кызматкери, жергиликтүү бийлик өкүлдөрү жана “China Railway International” компаниясынан 4 адам жүктөгүч менен чыгышкан. ӨКМге караштуу Республикалык өзүнчө куткаруу отрядынын куткаруучулары да тартылышкан.
Мындан сырткары, кытайлык темир жолчулардын кошумча оор инженердик 2 техникасын жолду ачууга тартылган.
Эске салсак, ашуудагы бул унаа жолу 2025-жылдын 1-октябрында Тогуз-Торо жана Сузак райондорунун акимдери чыгарган тескемелердин негизинде жабылган.
