Бул жолку каарманыбыз “Шо энди” деп сүйлөгөн кыз 7 жылдан кийин алгачкы жолу маек берип, ошол видео кантип тартылып калганы тууралуу айтып берди. “Мен ал видеону жөн эле тартып койгом, бирок үйдөгүлөр көрүп калып аябай күлүшкөн, ошентип интернетке чыгарып жиберип таанымал болуп кеттим» дейт ал.
«Видео чыкканына 7 жыл болду. Азыр 8-класста окуп жатам. Биз жайлоодо жашачубуз. Телефон эми жетип жаткан учур болчу. Телефонго аябай кызыккам. Нан жеп отуруп эле видео тартып койгом. Негизи видеону тартып туруп эле өчүрүп салам деп унутуп калыптырмын. Ата-энем көрүп, күлүп коюшкан. Туугандар «жайлоодо эмне жаңылык?» деп сурап калышат да. Ошондо менин видеомду жөнөтүп коюшат. Москвадагы эжемдер көрүп, интернетке чыгарып койгон экен. Жайлоодон түшкөндөн кийин эле баары мени таанышат. «Сенин видеоң тарап кетиптир, көрдүк» дешти. 1-класска барганда мугалим «сен азыр жашсың, видео тартпа, окушуң керек» деп урушкан. Ошондон кийин видео тартпай, токтолуп калгам. Кийин келип «кечирип кой, сенин шагыңды сындырып алыптырмын» деп кечирим сурады»,- деди ал.
