Бүгүн, 19-марттагы Жогорку Кеңештин тармактык комитеттеринин биргелешкен жыйынына УКМК төрагасы Камчыбек Ташиев келип, кыргыз-тажик арасы боюнча маалымат берип жатып, депутат Султанбай Айжигитовго да токтолгон.
«2017-жылы баланы уруп коюп, анан беренелер алмашып атып, мөөнөтү өттү деп сизди кылмыш жоопкерчилигинен бошоткон турбайбы. Бирок ошол боюнча маалымкатты БШКга бербептирсиз. Мен карап чыктым. БШК эртең Айжигитовдун мандатын алып койсо, таң калбаңыздар»,- деген төрага.
Камчыбек Ташиевдин айтканы боюнча Султанбай Айжигитов да ага жооп берди.
«Мен бүгүн чек ара боюнча сүйлөбөйүн дегем. Мен позициямды айттым, ошол позицияда турам. Башка сүйлөштүн кажети жок. Эми сиз менин жеке атымды атап, күнөөлөрдү коюп жаткан соң, мен ошол боюнча сөз кыйлайын. Азыр акча да, күч да, ЖМКда силердин колуңарда.
Биринчиден, баланы урган боюнча ошол жерде тартылган видеолор бар. Мен аны муунтуп, көгөртүп, тепкилеп салгандай айтып жатасыңар. Экспертизанын сүрөттөрү каякта? Жок да эч нерсе, куру сөздөр да. Анын баары уюштурулган провокация болчу. Мен ошондо эле айткам. Ал жерде менин аялым чыгып, «ата-энелер комитети мыйзамдуу эмес, бул болбойт» дегени үчүн менин баламды куугунтукка алган. 3-4 бала дайыма менин баламды тоноп жүргөн. Ошонун артынан менин балам 1 жыл дарыланды. Буга ким жооп берет? Ошону ошол жерде жаап койсом болмок. Мен принципке туруп, аягына чейин баргам. Тергөөчүлөр менин башыма эч нерсе коё албай, качып кетти деп коюшкан. Мөөнөтү өтүп кетти деп жапкан. Мен соттолгон эмесмин. БШК суроо жөнөткөн. Кылмыш иши ачылып, мөөнөтү өттү деп жабылган. Сизге деле кылмыш иши ачылган. Президенттин үстүнөн да ачылган. Соттолгонуңарды жаптыңар го, меники да алып салынган», — деди депутат.
«Мен фактыны айттым, сот эмне болгонун мен билбейм. Биз боюнча, биз муунтуп, балдарды урган эмеспиз. Биз саясий жактан соттолгонбуз. Сиздикин сот мөөнөтү өткөн үчүн жапкан, бизди актаган»,- деди Ташиев.
